Гаврилов Аким Андреевич

1904 елның 22 сентябре, Казан губернасы, Зөя өязе (хәзер Югары Ослан районы) Олы Мәми авылы – 1982 елның 22 гыйнвары, Алабуга шәһәре.

Мәктәпне тәмамлаганнан соң, 1921–1926 елларда Донбасста шахтада, 1926–1933 елларда туган авылында колхозда, Разумов исемендәге совхозда (соңрак «Мамадыш» совхозы) профсоюз эшендә эшли (1936 ел), Әгерҗе шәһәрендә «Кызыл Шәрекъ» заводы базасы белән идарә итә (1938–1939 еллар), 1940–1942 елларда Алабуга шәһәренең «Ударник» артелендә эшли.

1942 елның июленнән Кызыл Армиядә.

Казан танк училищесен тәмамлый (1943 ел).

1943 елдан Бөек Ватан сугышы фронтларында, 136 нчы гвардия укчы полкның (40 нчы армиянең 42 нче гвардия укчы дивизиясе) взвод командиры. 1943 елда Воронеж һәм 1 нче Украина фронтлары гаскәрләре составында Курск һәм Полтава сугышларында, Сумы өлкәсен азат итүдә катнаша.

Черкассы өлкәсенең Маньков районы Антоновка авылы янындагы Таулы Тикич елгасын кичкәндә батырлык күрсәтә. Взводны үз артыннан әйдәп, беренче булып бозлы суга ташлана. Суны кичеп, взвод плацдармда ныгып кала, аны кулда тоту һәм киңәйтү өчен сугыш алып бара. Гаврилов авыр яралана.

1944 елның сентябрендә запаска җибәрелә.

1944–1945 елларда Алабуга районы Разживино авыл советы рәисе.

1946–1957 елларда райбашкарма комитетының социаль тәэминат бүлеге мөдире, ТАССР Әзерләүләр министрлыгы вәкиле, Алабуга шәһәр советы башкарма комитеты рәисе урынбасары.

 Ике Ленин ордены, медальләр белән бүләкләнә.

Алабугада Хәтер мәйданында А.А.Гаврилов бюсты, Югары Ослан авылы Геройлар паркында мемориаль такта, туган авылында обелиск урнаштырыла.

Алабуга шәһәрендә һәм Олы Мәми авылында аның исеме белән урамнар атала.

Герои Советского Союза — наши земляки. Казань, 1982. Кн. 1;

Герои Советского Союза: краткий биографический словарь. М., 1987. Т. 1;

Батырлар китабы — Книга Героев. Казань, 2000;

Населённые пункты Республики Татарстан: иллюстрированная энциклопедия: в 3 т. Казань, 2021. Т. 2. С. 14, 19, 20, 21, 223, 228;

Книга Героев = Батырлар китабы / сост.: М.В.Черепанов, Е.В.Панов. Казань, 2022. С. 39.

Авторлар — М.З.Хәбибуллин, Л.М.Айнетдинова, Г.Х.Галимуллина