Азиев Камил Гали улы

1930 елның 16 июле, Башкортстан АССРның Благовар районы Каргалы Тамак авылы – 1999 елның 9 январе, Омск шәһәре.

Башкортстан авыл хуҗалыгы институтын тәмамлый (1952).

1956–1973 елларда Себер авыл хуҗалыгы фәнни-тикшеренү институтында (Омск шәһәре), 1965 елдан орлыкчылык бүлеге мөдире.

1973 елдан Көнбатыш Себер селекция үзәге җитәкчесе, биредә Урал, Себер һәм Төньяк Казакъстан өлкәләрендә сортлар чыгару һәм гамәлгә кертү буенча өр-яңа программалар эшләнә һәм үзләштерелә, бөртекле, бөртекле-кузаклы культураларның, бәрәңге һәм үләннәрнең 60 лап яңа сорты һәм гибриды чыгарыла; бу сортлар 7 млн гектардан артык мәйданда 37 өлкә, край, республикада районлаштырыла; 8 сортның автордашы.

Хезмәтләре авыл хуҗалыгы җитештерүчәнлеген интенсивлаштыруга, орлыкчылык агроэкологиясенә һәм оештыру-икътисад нигезләренә, Көнбатыш Себердә югары сыйфатлы орлык җитештерү технологиясен эшләүгә карый.

«Почёт билгесе» ордены, медальләр, шул исәптән СССР ВДНХсының көмеш медале белән бүләкләнә.

Семеноводство в Омской области. Новосибирск, 1981.

Яровая пшеница в Западной Сибири. М., 1981.